بيقولك فيه مليونية يوم 8 يوليو(تموز) و محدش يقولي يعني ايه تموز دي..ما علينا..
طب هتنزل و لا لأ؟؟!!....سؤال بيطرح نفسه....
اخر مرة نزلنا فيها الميادين كانت امتى؟؟!!....حد فاكر....طب للي فاكر..من ساعتها
و حتى الان ايه الجديد؟؟!!...و ايه اللي اتحقق من المطالب؟؟!!..أبسط المطالب؟؟!!
اعتقد مفيش...و لا ايه؟؟؟!!!
طيب يبقى المفروض ان كلنا ننزل...ننزل عشان نطالب بمطالب مشروعة زي ايه
المحاكمات السلحفية اللي بتم دي لرموز الفساد و اولهم الحاج حسني و عياله..
الاغرب ان المدنيين بيتحاكموا عسكريا و بيتحكم عليهم بسرعة جدا....طب ليه؟؟!!
الفلوس اللي اتنهبت دي و لسة مفيش اي خطوة حقيقية او جدية عشان ترجع..
و لا خلاص نقول عوضنا على الله بقى و خلاص..؟؟؟!!
اسر الشهداء اللي محدش سأل فيهم خالص و لا كأنهم بيمثلوا شيئ...رغم انهم اعظم
ناس موجودين حاليا في مصر...ضحوا بكل شيئ عشانها..و احنا قدمنالهم ايه؟؟؟!!!
المصابين اللي مش لاقيين علاج...و عمنا حسني بيتعالج على حسابنا في احسن
مستشفى في شرم....!!!!
و الانفلات الامني كمان..ده الا الانفلات ده حاجة عجب و الله..
تطهير كل اجهزة الدولة اللي لسة فيها الفساد للركب على رأي المعلم زيكا...
و غيرها كتييييييييييييير و كتيييييييييير...
لو حد فاكر المطالب المشروعة دي بنطالب بيها من امتى يا ريت يقولي...
متهيألي الثورة كانت قامت عشان حاجة زي كدة و لا انا فقدت الذاكرة و لا ايه!!!
طب فين الثورة؟؟!!!...فين التحرير؟؟!!!
فاكرين بعد ما حسني مشي قالوا ايه؟؟؟!!..سيبوا حكومة شفيق تشتغل و نديها فرصة
و لو ما اتحققتش المطالب التحرير موجود ابقوا ارجعوا.....
و الكلمة دي بقت تتكرر كتييييييير بعد كدة...لولا اصرارنا ان احنا نكمل و نقعد في
الميدان...كان زمان حسني رجع تاني....
اكبر غلطة عملناها ان احنا سبنا التحرير...هناك كنا بنحس ان احنا مصريين فعلا..
بنحس بكرامة و عزة نفس كدة مش قادر اوصفها..اكيد كل اللي نزل حس بيها...
انا عن نفسي هموت و ارجع التحرير...حتى لو مفيش مطالب بس ارجع...
اللي عايز يجي معايا يتفضل و اللي عايز يتفرج يتفرج بس يا ريت بلاش تشتم في حد...
و الله الموفق......
0 comments:
Post a Comment